Madaxweynaha PL oo furey ceelkii ugu horeyey ee shidaal

Madaxweynaha Dowladda Puntland Dr.Cabdiraxman Maxamed Maxamud Farole ayaa maanta 16 Jan, 2012 si rasmi ah ugu dhawaaqey shidaal qodis in laga bilaabo deegaanada Puntland kadib markii uu ka qaybgalay xaflad si caalami ah loo soo maamuley oo loogu talagalay furitaanka mashruuca shidaal qodista Puntland kana dhacdey dooxada Dharoor ee gobolka Bari.

Madaxweynihii hore ee Puntland Gen.Cadde Musse , ku dhowaad 10 Wasiir oo ka tirsan xukumadda Puntland, qaar ka mid ah mudanyasha Barlamaanka,saraakiisha militeriga iyo booliska Puntland, Agasimayal ,Salaadiin ,issimo ,Nabadoono, Culimo ,Aqoonyahano ,Ganacsato, saxaafada, madaxda hayadaha African Oil iyo Range Resources oo barnaamijkan fulinaya iyo marti sharaf kale oo aad u badan ayaa goob joog ka ahaa xafladii maanta ka dhacdey xarunta shidaal qodista koowaad oo lagu magacaabo Ceelka Shabeel1.

Bilawgii ayaa waxa halkaasi ka hadlay Garaad Cabdulaahi Cali Ciid iyo Suldaan Cabdisalaan Shiikh Maxamuud oo amaan iyo bogaadin usoo jeediyey dhamaan intii hirgelisey Puntland degaaanadeeda in laga bilaabo shidaal qodistan,waxana ay ku booriyeen madaxda Puntland in la sii wado dadalada looga fa’ideysanayo khayradka dabiiciga ah ee dalkeena.

Agaasinka guud ee hayada Batroolka iyo Macdanta Puntland Ciise Maxamud Faarax Dhoolawaa ayaa isna ka sheekeyey heerarkii uu soo maray barnaamijkan iyo ugu danbeyntii oo maanta loo fadhiyey in la bilaabo qodistii ugu horeysey.

Madaxda African Oil iyo Range Resources oo heeshiisyo kula jirta Puntland inay hawshan qabato ayaa ka soo jeediyey hadalo kooban madasha munaasabadu ka dhaceysey,waxana ay sheegeen in aysan ku iman arintan go’aan hal maalin ee loo soo maray dadaalo badan iyagoona uga mahadceliyey Madaxweynaha Puntland Dr. Cabdiraxman Farole sabarka uu muujiyey iyo dulqaadka caqabadihii la soo gudbonaadey mashruucan.

Ugu danbeyntii ayaa waxa lagu soo dhaweeyey Madaxweynaha Puntland oo ugu horeyn mahad balaaran u soo jeediyey ciidamada amaanka Puntland oo ka qayqaatey sugida amaanka ceelka iyo weliba alaabtii lagu qodayay oo Bossaso  ka keeneen.

Madaxweynuhu waxa uu sheegay maanta 16 Jan,2012 in taariikhi u tahay umadda reer Puntland iyo Somalia,waxana uu raaciyey in ceelkan waxa ka soo baxa uu san u ekayn Puntland balse  Somalia la wadaagi doonti haddii la israaco oo dalka Dastuur mideysan yeesho.

Shabeele kow oo lagu magac darey Shabeelka (Tiger) ayaa maanta si rasmi ah madaxweynuhu ka qaybgalay furitaankiisa,waxana uu tilmaamey in dhowaan Puntland ka baxayso baahida iyo wax weydiisiga hadii Eebe idmo.

‘’In nala baryo mooyee,wax danbe baryi meeyno ,hadii shidaalkaasi inoo soo baxo’’ ayuu yiri Dr.Farole.

Madaxweynuhu waxa uu ku adkeeyey in barnaamijkan  ka faa’ideysan doonaan dhalinyarada aqoonta leh oo jaamacadaha ka baxay ee reer Puntland waxana uu raaciyey sidoo kale in waxtar u yahay kuwa xoogooda maasha oo dhankooda ka qaybqaadan doona.

‘’Hadii aanu helney dad hantidoodi,nafsadoodi iyo wakhtigoodi noo hurey oo hawshan ogolaadey inay qabtaan,inaga waxaa nagu soo aadey in nabadgelyado helaan,sabur yeelano sida nala ka codsadey ,wadashaqayna inaan muujino waa muhiim’’ ayuu yiri Dr.Cabdiraxman Maxamed Farole.

Madaxweynaha Puntland Dr.Cabdiraxman Maxamed Maxamuud ayaa duco kusoo khatimey hadalkiisa isagoona Alle uga baryey in uu dhibka ka dulqaado guud ahaan umadda Soomaaliyeed.

Xaflada ayaa lagu soo gabagabeyey qado sharaf loogu talo galay martida waxana bilaabey madaxweynaha Puntland oo ka dib intaasi fuuley riiga qodayey shidaalka si uu gacanta ugu dhaqaajiyo markii ugu horeysey oo Puntland shidaal qodid laga bilaabo.

Dhanka kale Madaxweynaha Puntland Dr.Cabdiraxman Maxamed Farole ayaa markii ay soo dhamaatey munaasabada furitaanka ceelka Shabeel1 waxa uu safrey dhanka magalada Jabouti ee xarunta dalka Jabouti,waxana ku weheliyey socdaalka wasiirka arimaha gudaha dawladaha hoose iyo horumarinta reer miyiga Gen. Cabdulahi Axmed Jaamac Ilkajiir iyo sarakiil ka tirsan xafiiska madaxweynaha, iyadoona la filayo in ay usii gudbaan dhanka Isutaga Imaaraadka Carbeed.